Bihar Elections : બિહાર વિધાનસભા ચૂંટણીની મતગણતરીમાં ફરી એકવાર NDAની સરકાર બનતી દેખાઈ રહી છે અને મોટાભાગના એક્ઝિટ પોલના અનુમાન સાચા પડી રહ્યા છે. જો કે, આ દરમિયાન ભારતીય જનતા પાર્ટી (BJP) માટે એક ચિંતાજનક સમાચાર સામે આવ્યા છે. ભાજપના સૌથી મજબૂત અને પરંપરાગત ગઢ ગણાતા પટણા સાહિબ વિધાનસભા બેઠક પર કોંગ્રેસના ઉમેદવારે શરૂઆતી તબક્કામાં મોટી લીડ મેળવી લીધી છે.
પટણા સાહિબમાં કોંગ્રેસ 5000 વોટથી આગળ
બે કલાકની મતગણતરી બાદ પટણા સાહિબ બેઠક પર ભારે રસાકસી જોવા મળી રહી છે. આ બેઠક પર ભાજપે આ વખતે 7 વખતના ધારાસભ્ય નંદકિશોર યાદવની જગ્યાએ યુવા ચહેરો રતનેશ કુમારને ટિકિટ આપી છે. જ્યારે કોંગ્રેસે શશાંત શેખરને મેદાને ઉતાર્યા છે.
પહેલા બે રાઉન્ડની ગણતરીમાં કોંગ્રેસના ઉમેદવાર શશાંત શેખરે 5000 વોટની લીડ મેળવી લીધી હતી. જો કે, ત્રીજા રાઉન્ડમાં આ અંતરાળ ઘટીને 3000 વોટની લીડ સુધી પહોંચી શક્યો છે. આ પરંપરાગત ભાજપની બેઠક પર કોંગ્રેસની આ શરૂઆતી લીડ પક્ષ માટે ચિંતાનું કારણ બની છે.
જનસંઘના સમયથી ભાજપનો ગઢ
પટણા સાહિબ બેઠક 2008ના સીમાંકન પછી અસ્તિત્વમાં આવી, જે અગાઉ પટણા પૂર્વી તરીકે ઓળખાતી હતી. આ બેઠક ભાજપની સૌથી મજબૂત બેઠકોમાંની એક ગણાય છે, જ્યાં પાર્ટી સૌથી ખરાબ સમયમાં પણ જીતતી આવી છે. 1995થી આ બેઠક પર ભાજપના વરિષ્ઠ નેતા નંદકિશોર યાદવનો સતત કબજો હતો. આ વખતે પાર્ટીએ તેમને બદલે રત્નેશ કુમાર પર વિશ્વાસ મૂક્યો છે.
ભગવા પક્ષ જનસંઘના ઘણાં સમયથી અહીં સત્તામાં છે. 1967 અને 1969ની ચૂંટણીમાં જનસંઘના રામદેવ મહતો અને 1977ની ચૂંટણીમાં જનતા પાર્ટીની ટિકિટ પર પણ રામદેવ મહતોએ જીત મેળવી હતી. આજે પટણા સાહિબમાં આ પરંપરાગત ગઢ ભાજપ જાળવી રાખે છે કે કોંગ્રેસ અહીં મોટો અપસેટ સર્જે છે, તેના પર સૌની નજર છે.
