પાલનપુર: બનાસકાંઠાના મુખ્ય મથક એવા પાલનપુરમાં લોન આપવાના નામે મોટા પ્રમાણમાં છેતરપિંડી કરતી ગેંગ સક્રિય છે. જે પાલનપુર સહિત ગાંધીનગરમાં પોતાની ઓફિસ હોવાનું કહીને ખેડૂતોને સબસીડી સહિતનું લોન આપવાનું કહીને તેમના સાથે મોટા પ્રમાણમાં છેતરપિંડી કરી રહી છે. આપણે પોતાની પ્રથમ સ્ટોરીમાં એક ખેડૂત સાથે 2 લાખ 65 હજારની છેતરપિંડી કરી હોવાનો ખુલાસો કર્યો છે.
જોકે, હવે એવી ચોંકાવનારી માહિતી મળી રહી છે કે, આ ઠગ ટોળકી પોતાના ગ્રાહકોને નકલી ચેક બતાવીને પણ પૈસા પડાવી રહ્યાં છે. આ ઠગ ટોળકી દ્વારા વધુ એક વ્યક્તિ સાથે દોઢ લાખ રૂપિયાની છેતરપિંડી કરવામાં આવી છે. ખેડૂતને સબસીડીવાળી લોનની લાલચ આપીને પોતાનું કમિશન આપવાની વાત કરવામાં આવી હતી. ખેડૂતને કહેવામાં આવ્યું કે, તમને સાત લાખ રૂપિયાની લોન કરી આપીશું પરંતુ તમારે અમને અમારો વ્યવહાર આપવો પડશે.
ખેડૂતે કહ્યું કે, કામના જે પણ કાયદેસર પૈસા તમારા બનતા હશે તે તમને હું તમને આપી દઈશ. તે પછી ખેડૂત પાસેથી લોગિંન ફિ, વિમા સહિતના અલગ-અલગ બાબતોને લઈને 50 હજાર રૂપિયાથી લેવામાં આવ્યા હતા. તે પછી ખેડૂતને કહેવામાં આવ્યું કે, તમારી લોન થઈ ગઈ છે. તમારો ચેક પણ આવી ગયો છે તો તમે અમારો વ્યવહાર આપો અને તમારો ચેક તમારા ખાતામાં જમા કરાવી દેવામાં આવશે.
આ વાત કરીને એક લાખ રૂપિયાની રોકડ લઈને ગ્રાહકને પાલનપુરની એક પ્રતિષ્ઠિત હોટલમાં બોલાવવામાં આવ્યો હતો. આ દરમિયાન બને છે કે એવું કે ખેડૂતને એક સીઆઈડી અધિકારી આવીને પકડે છે અને પૂછે છે કે તમે તમારા બેંક ખાતાને કેમ અન્ય લોકોને આપી રહ્યાં છો? શું તમે ડબ્બા ટ્રેડિંગ માટે તમારો બેંક એકાઉન્ટ ભાડે આપી રહ્યાં છો?
આમ અચાનક આવી ધમકેલા અધિકારીએ ખેડૂતને ખખડાવી નાંખ્યો અને કંઈ જ બીજું વિચારવાનો સમય આપ્યો નહીં. આ બધા વચ્ચે ઠગ ટોળકીએ ખેડૂત પાસેથી 1 લાખ રૂપિયા લીધા અને તેમને ઈન્ડિયન ઓવરસિસનો તેમના નામે બનાવેલો ચેક પણ બતાવ્યો હતો. ખેડૂતને કહેવામાં આવ્યું કે, ઉપરથી ક્લિયરન્સ આવી જાય એટલે ચેક તમારા ખાતામાં જમા કરાવી દેવામાં આવશે.
જોકે, તે ચેક ક્યારેય ખેડૂતના ખાતામાં જમા કરાવવામાં આવ્યો નહીં. કેમ કે તે નકલી હતો. ખેડૂતને થોડા સમય ખ્યાલ આવ્યો કે તેના સાથે લોન આપવાના નામે છેતરપિંડી કરવામાં આવી છે. તેથી તે પોલીસ સ્ટેશન પહોંચ્યો અને પોલીસને પોતાની આપવીતિ જણાવી હતી. પોલીસે કહ્યું કે, વકીલ દ્વારા તમે અરજી આપો અને તમારી અરજીના આધાર આગળની તપાસ કરીશું. તો ખેડૂતે વકીલની મદદ લઈને પોલીસ સ્ટેશનમાં ઠગ ટોળકી સામે અરજી કરી છે. જે અરજી નીચે પ્રમાણે અમે એડ કરી રહ્યાં છીએ. જે દર્શાવે છે કે ઠગ ટોળકી એકદમ અમાનવીય રીતે લૂટી રહ્યાં છે.
આમ પાલનપુરમાં સક્રિય ઠગ ટોળકી લોકોને છેતરવાનું કામ કરવાની સાથે-સાથે બીજા પણ અનેક ગેરકાયદેસર કામ કરી રહી છે. જેમ કે પોતાના નકલી સીઆઈડી અધિકારીઓ ઉભા કરીને લોકોને ડરાવી ધમકાવીને પૈસા પડાવવા, તો ખેડૂતોના નામના નકલી ચેક બનાવીને તેના થકી છેતરપિંડી કરવી. ઠગ ટોળકી દ્વારા એકથી વધારે ગુનાહિત પ્રવૃત્તિઓ કરવામાં આવી રહી છે.
આ ટોળકીમાં વિજય પરમાર, ધવલ પરમાર, કિરન પરમાર સહિતના અનેક લોકો જોડાયેલા છે. ગેંગના અન્ય લોકોની માહિતી હજું સામે આવી શકી નથી. જોકે, ટૂંક સમયમાં આવી જશે. જેઓ ભેગા મળીને લોકોને ચૂનો લગાવી રહ્યાં છે. આ ઠગ ટોળકીને કાયદાનો કોઈ ડર જ રહ્યો નથી. તેથી તો તેઓ બેખૌફ બનીને ગેરકાયદેસર કામના પૈસા પણ ઓનલાઈન પોતાના ખાતામાં લઈ રહ્યાં છે. પૈસા મળ્યા પછી તેઓ પીડિત વ્યક્તિનો ફોન પણ ઉપાડવાનું બંધ કરી દેતા હોય છે. પ્રથમ દ્રષ્ટિએ તો ઠગ ટોળકીને પોલીસનો કોઈ ડર હોય તેવું દેખાઈ રહ્યું નથી.
નીચે ફોટોમાં પીડિતને પાલનપુર રામદેવ હોટલમાં બોલાવ્યા તે સમયના ફોટો દેખાઈ રહ્યાં છે, જ્યાં તેમની પાસેથી એક લાખ રૂપિયા રોકડા લેવામાં આવ્યા હતા. પીડિતે બંને ફોટો આઝાદ ગુજરાતને આપ્યા છે. પીડિત દ્વારા ઠગ ટોળકીના મુખ્ય કર્તાહર્તા એવા વિજય બલવંત પરમારની આઈ ટેન ગાડીનો ફોટો પણ મોકલવામાં આવ્યો છે. જે નીચે પ્રમાણે તમે જોઈ શકો છો.
આ પાછળનું કારણ એવું આપવામાં આવે છે કે, ઠગ ટોળકીના પરિજનોના અનેક લોકો પોલીસ બેડામાં ફરજ બજાવે છે, તેથી તેઓ બીજાને ડરાવીને પોતાનું કામ કઢાવી લઈ રહ્યાં છે. પરંતુ પ્રશ્ન તે ઉભો થઈ રહ્યો છે કે, શું તેમના પરિજનો કે જેઓ પોલીસ બેડામાં ફરજ બજાવી રહ્યાં છે તેમને ખ્યાલ છે કે આ ટોળકી ખુબ જ ગંભીર ક્રિમિનલ પ્રવૃત્તિઓમાં સંડોવાયેલી છે? જો ખ્યાલ હોય તો વધારે ગંભીર બાબત ગણી શકાય અને ખ્યાલ નહોય તો તેઓ પોતાના પરિજનો સાથે પણ છેતરપિંડી કરીને પોલીસનું નામ બગાડી રહ્યાં છે.
ખેરાલુના ચૌધરી સમાજના ખેડૂત સાથે પણ કંઈક આવી જ રીતે છેતરપિંડી કરવામાં આવી હતી. તેમને પણ ઈન્ડિયન ઓવરસિસ બેંકના તેમના નામના ચેક બતાવવામાં આવ્યા હતા. પરંતુ જ્યારે તેમને ઈન્ડિયન ઓવરસિસ બેંકમાં તપાસ કરી તો જાણવા મળ્યું કે, તેમના નામના આવા ચેક ક્યારેય બનાવવામાં આવ્યા જ નહતા.
ઠગ ટોળકી અનેક રીતે ખેડૂતો અને સામાન્ય લોકો સાથે છેતરપિંડી કરી રહી છે. અત્યાર સુધીમાં અનેક લોકોને તે ટાર્ગેટ બનાવી ચૂકી છે. આગામી લેખમાં ઠગ ટોળકી દ્વારા છેતરાયેલા અન્ય લોકોના ઈન્ટરવ્યું પ્રકાશિત કરવામાં આવશે.
ઉલ્લેખનિય છે કે, આ ઠગ ટોળકી દ્વારા છેતરાયેલા મોટા ભાગના લોકો ગ્રામીણ છે. તેઓ પોલીસ પાસે જાય છે તો પણ તેમની એફઆઈઆર લેવામાં આવી રહી નથી. જો કે, તે છતાં આ વખતે આ ઠગ ટોળકી ઉપર અરજી તો થઈ ગઈ છે.
તો આ ઠગ ટોળકી વિશે વધુ માહિતી આવતા અંકે… આવા લૂટારાઓથી સચેત રહો, સાવધાન રહો, સુરક્ષિત રહો..
આ પણ વાંચો- પાલનપુરમાં લોન આપવાના નામે છેતરપિંડી કરતી ગેંગ સક્રિય; ખેડૂત પાસેથી પડાવ્યા લાખો રૂપિયા
પીડિત વ્યક્તિ પાસેથી ઠગ ટોળકી દ્વારા લેવામાં આવેલા પૈસાની સ્કીન શોર્ટ
