પાલનપુર: બનાસકાંઠામાં અંગ્રેજી અને દેશી દારૂનો વેપલો એક અલગ જ ઉંચાઈએ પહોંચી ગયો છે. બનાસકાંઠા એસપી અક્ષયરાજ મકવાણાના નેતૃત્વમાં બીજી બધી રીતે તો સુરક્ષિત હોય તેવું દેખાઈ રહ્યું છે, પરંતુ પોહિબિશન બાબતે એક અલગ જ પ્રકારનું વિકાસ થઈ રહ્યું છે. પાલનપુર, ડિસા અને ધાનેરાના બુટલેગરો વિકાસના પંથે છે. ખાસ કરીને ડિસાના બુટલેગરોએ પોલીસ સાથે ખુબ જ સારી રીતે ઘરોબો કેળવી લીધો છે.
તેથી ડિસાના બુટલેગર અંકુર મોદીએ ઓનલાઈન દારૂનું વેચાણ શરૂ કર્યું છે. બનાસકાંઠાના મુખ્ય મથક એવા પાલનપુરથી 15 કિલોમીટર દૂર આવેલા ડિસામાં અંકુર મોદી નામનો નામચીન બુટલેગર છે. જે પોતાના દારૂના ધંધાને એક નવી ઉંચાઈ ઉપર લઈ જવા માટે તેના દ્વારા વેચવામાં આવતી દારૂની બોટલો ઉપર ક્યુઆર કોડ લગાવી દેવામાં આવ્યા છે. આ ક્યુઆર કોડને તમે સ્કેન કરો તો તમે સીધા અંકુર મોદી દ્વારા બનાવવામાં આવેલી વેબસાઈટ ઉપર જતાં રહો છો. ત્યાંથી તમે તમારી મનપસંદ દારૂનું ઓર્ડર આપી શકો છો. ઓર્ડર કરતાંની સાથે જ થોડી વારમાં તમારા ઘર સુધી દારૂ પહોંચી જશે.
આમ અંકુર મોદીએ દારૂનું ઓનલાઈન વેચાણ શરૂ કરી દીધું છે. જોકે, આ વાત સામે આવતા થોડા સમય માટે તેને પોતાની વેબસાઈટે સ્થગિત કરી દીધી છે. મામલો ઠંડો થશે તો ફરીથી પોતાની ઓનલાઈન સેવા ચાલું કરી શકે છે. આમ જોવા જઈએ તો ડિસાના તમામ વિસ્તારમાં સરળતાપૂર્વક દારૂ મળે છે. આ તમામ દારૂનો જથ્થો અંકુર મોદી જ પૂરો પાડે છે. ડિસામાં 20થી વધારે જગ્યા પર અંગ્રેજી દારૂનું વેચાણ કરવામાં આવી રહ્યું છે, તે ઉપરાંત દેશી દારૂના અનેક પીઠા પણ ધમધમે છે.
આ તમામ રીતના કાળા કામ પોલીસની રહેમનજર હેઠળ થાય છે. પોલીસના વિશ્વસનિય સુત્રો પાસેથી મળી રહેલી માહિતી અનુસાર, અંકુર મોદી મહિને 50 લાખ રૂપિયાથી વધારેનું ભરણ આપે છે. જે પાલનપુર એસપી કચેરી સુધી પહોંચતું હોવાની કથિત માહિતી પણ મળી રહી છે. ખેર, બનાસકાંઠાની એસપી કચેરી સુધી અંકુર મોદીનું ભરણ પહોંચે છે કે નહીં તે એક અલગ પ્રશ્ન છે.
તેના ઉપર ચર્ચા કરવા માટે કેટલાક પૂરાવા પણ જરૂરી છે. કોઈપણ મોટા અધિકારી ઉપર સીધો આરોપ મૂકી શકાય નહીં. જો ગુજરાત જેવા રાજ્યમાં દારૂનું ઓનલાઈન વેચાણ કરતો હોય અને તેનાથી એસપી અક્ષયરાજ પોતે અજાણ હોય તો દિવા તળે અંધારૂ જેવી બાબત ગણી શકાય? તર્ક તે છે કે, કાં તો તેઓ આનાથી અજાણ હોઇ કે, કાં તો તેમની કચેરી સુધી અંકુર મોદીના હાથ પહોંચી ગયા છે.
બુટલેગર અંકુર મોદીના રાજમાં અક્ષયરાજ પણ નિષ્ફળ, ડિસા બન્યું અંગ્રેજી દારૂનું હબ pic.twitter.com/e1Ga9foPD5
— Azad Gujarat (@AzadGujarat) August 9, 2025
ઉલ્લેખનિય છે કે, આગામી દિવસોમાં જિજ્ઞેશ મેવાણી દ્વારા પણ બનાસકાંઠામાં દારૂ સહિત એમડી ડ્રગ્સના વેચાણના પણ આરોપ લગાવ્યા હતા. આ સાથે જ બનાસકાંઠા એસપી પોહિબિશનના પોતાના કામમાં કાચું કાપી રહ્યાં હોય તેવું સ્પષ્ટ દેખાઈ રહ્યું છે.
ડિસા એટલે કે તેમના નાક નીચે જ ગણી શકાય, ત્યાં જ અંગ્રેજી દારૂનું એક નવું હબ બનાવી દેવામાં આવ્યું છે. તે છતાં તેમના માંથામાં જૂ નથી રેગંતી.. આ બધી બાબતમાં ડિસા પોલીસની ભૂમિકા શું હોઈ શકે છે? આખા ડિસાનું ભરણ અંકુર મોદી આપતો હોવાની માહિતી સામે આવી રહી છે. ડિસાના તમામ પોલીસ સ્ટેશનમાં અંકુર મોદીનું ભરણ ચાલી રહ્યું છે. ડિસાના તમામ પોલીસ સ્ટેશનના પીઆઈ અંકુર મોદીને દારૂનો વેપાર કરતાં કેમ રોકી રહ્યાં નથી?
પ્રશ્નનો જવાબ એકદમ સરળ છે. તમામ પોલીસ સ્ટેશનમાં અંકુર મોદી દ્વારા હપ્તા આપવામાં આવે છે. તેથી તો એકદમ સરળ રીતે દારૂ વેચી શકે છે અને ઓનલાઈન દારૂ વેચવા માટે કોઈ જ ડર વગર વેબસાઈટ બનાવી શકે છે.
હવે પ્રશ્ન છે કે પોલીસનું કામ માત્ર દારૂનો વેપાર કરાવવા માટેનો જ છે. રાજ્યના ગૃહમંત્રી હર્ષ સંઘવીને ખ્યાલ હશે કે તેમની પોલીસ ગાંધીના ગુજરાતમાં કેવી કામગીરી કરી રહી છે. શું તેમને ખ્યાલ છે કે ગુજરાતમાં ઓનલાઈન પણ દારૂ મંગાવી શકાય છે. તેમના હોનહાર એવા અક્ષયરાજ મકવાણાના રાજમાં બનાસકાંઠાનું ડિસા દારૂ માટે એક આગવું હબ બની રહ્યું છે.
ડિસા અત્યાર સુધી બટાકાને લઈને ઓળખાતું હતું પરંતુ અંકુર મોદીની અથાગ મહેનત અને પોલીસની નકારાત્મક ભૂમિકાના કારણે હવે દારૂના હબ તરીકે જાણીતું થઈ શકે છે. આમ પણ પાછલા ઘણા સમયથી રાજયની સત્તાધારી પાર્ટી સામે અનેક પ્રશ્ન ઉભા થઈ રહ્યાં છે. રાજ્યના લોકો સત્તામાં બેસેલા લોકોથી કંટાળી ગયા છે. કેમ કે સત્તાધારી પોતાની જવાબદારીઓ નિભાવવામાં ઉણા ઉતર્યા છે.
ગુજરાતની પોલીસ અંગે પણ અનેક પ્રશ્ન ઉઠી રહ્યાં છે. તેથી હર્ષ સંઘવી પણ પોતાના કામમાં નિષ્ફળ દેખાઈ રહ્યાં છે. ગુજરાતમાં કાયદો અને વ્યવસ્થાની સ્થિતિ આટલી નમાલી ક્યારેય જોવા મળી નથી. ડિસાનું ઉદાહરણ પૂરતું છે. ઓનલાઈન દારૂ? પોલીસ અને કાયદો હોવા છતાં સાવ આવી સ્થિતિ?
અક્ષયરાજ મકવાણાને શું કરવા ત્યાં બેસાડ્યા છે? શું તેમના કોઈ સ્ત્રોત જ નહીં હોય? જે પોહિબિશન સહિતની ગુનાહિત પ્રવૃત્તિઓને ડિટેક્ટ કરીને તેમના સુધી તેની માહિતી પહોંચાડે? અક્ષયરાજ મકવાણા બનાસકાંઠામાં પોહિબિશનની કામગીરીને લઈને સદંતર નિષ્ફળ રહ્યાં છે. તેમની નાક નીચે કોઈ બુટલેગર આખા શહેરને દારૂનો અડ્ડો બનાવી દે છે અને તેમને ખ્યાલ નથી કે પછી તેમની મિલીભગત છે? તે એક મોટો યક્ષ પ્રશ્ન છે. પરંતુ ઓવરઓલ રીતે જોવા જઈએ તો આને અક્ષયરાજ મકવાણીની નિષ્ફળતા છે.
